L’ORDIN DAL NUSÉN AL CUMPÉS 25 AN
A pása i dé e a pása i an,
al ricórd al va luntán,
propria st’an l’é festa granda
“ i èn 25 “ l’aniversari
de ste gròp ed volontari.
25 an che al mès de znér
i-s tròven insém per giudichér,
tòt a sèder intorn ai tével
co’ i lumén per vèdregh bén,
per zerchér fra tant campión
cal piò bél e cal piò bón.
Tòt i mèster coi sculér
chi èn lé per imparér,
fra un campión e un’opinión
a finès anch al lezión,
con la Bruna indafaréda
a guardér al vutazión.
“ Rigorosa selezión ! “
Al culòr bruno marchê,
limpid come al zèl d’istê,
un prufòm ed nòs ‘d-cal bóni,
un ciuldén, un po’ ‘d canéla,
ecco pront con armonia
al nusén tradizionél.
L’é acsé che anch-e-st’an
a s’é truvê fra tant campión
cal piò bél e cal piò bón.
“ Un evviva ai vincitori “
un salut ai 25 an,
e ch’a sàmen tòt insém
per an e an e an……..!